Gjykata Themelore në Gjakovë ka pranuar kërkesën e Prokurorisë Themelore të Gjakovës, duke e lënë në paraburgim një muaj shtetasin shqiptar të Republikës së Kosovës me inicialet G.K, për shkak të dyshimit të bazuar se ka kryer vepër penale të vrasjes së rëndë.
I pandehuri me 11 shkurt 2020, rreth orës 11:00 në fshatin Bërnjak të Rahovecit, me qëllim të përfitimit të dobisë pasurore, me dashje ka privuar nga jeta vëllain e tij B. K.
“Në ditën kritike i pandehuri shkon në shtëpinë e të ndjerit dhe pasi futet nga dera e kuzhinës gjuan me pistolete tre-katër herë në drejtim të të ndjerit, i cili në ato momente gjendej i shtrirë në divan, duke biseduar në telefon. Pas kësaj ngjarje i pandehuri G. K. largohet nga vendi i ngjarjes në drejtim të shtëpisë së tij, për tu rikthyer në vendin e krimit pas 7-8 orësh, dhe pasi merr trupin e pajetë duke e tërhequr zvarrë me batanije, e nxjerr në oborr prapa shtëpisë, e mbulon me gjësende të ndryshme dhe i vë flakën. Me qëllim që të zhduk gjurmët, mbetjet dhe pjesë të kockave të të ndjerit i hedh jashtë shtëpisë në skaj të rrugës së lagjes”, thuhet në njoftim.
