Gjatë mesnatës në vendin tonë u shënua viktima e 27-ë nga koronavirusi, i cili mësohet të jetë në 71-vjeçar nga qyteti i Durrësit.
Mësohet se luftën me Covid-19 e humbu Çapajev File, ish-ushtarak i lartë në Forcën Detare të Shqipërisë, i cili ishte shtruar në spital me COVID-19 prej dy javësh, ndërsa ishte i intubuar.
File ka pasur një karrierë shumë të gjatë në Forcën Detare dhe ndonëse vitet e fundit kishte dalë në pension vijonte të ishte mjaft aktiv në aktivitetet e ndryshme të zhvilluara nga Forca Detare.
Në ditën e 70-vjetorit të lindjes ai u nderua me Medaljen e Mirënjohjes nga Ministrja e Mbrojtjes Olta Xhaçka, me motivacionin “Dalluar për kontributin e dhënë si ushtarak me një karrierë të spikatur në shërbim të Forcës Detare”.
File numëron plot 44 vite karrierë me Forcat e Armatosura dhe është dalluar për përkushtimin dhe profesionalizmin në detyrë.
Viktima ka qenë një anëtar i nderuar i Rotary Club dhe pjesëmarrës aktiv në veprimtaritë e ndryshme të organizuara nga kjo shoqatë në qytetin e Durrësit dhe më gjerë./Fjala.al/