Nënkryetari i Lëvizjes Socialiste për Integrim, Petrit Vasili pas përfundimit të mbledhjes së Këshillit Politik për Reformën Zgjedhore deklaroi se “nëse mazhoranca nuk përfshin opozitën në miratimin e reformës zgjedhore, ajo do të jetë nul.”.
Në një prononcim për mediat Vasili akuzoi mazhorancën se ajo synon një proces votimit të njëanshëm të Reformës Zgjedhore.
Sipas tij, miratimi i kësaj reforme vetëm nga PS-ja do të thellonte akoma më shumë krizën politike por dhe sociale në vend.
“Sa i takon propozimeve, çdo tendencë nga ana e mazhorancës, me gojën e Gjiknuri, për të akumuluar pafundësisht çështje që nuk marrin zgjidhje, është pjesë e strategjisë për të vënë situatën para faktit të kryer dhe për të miratuar në mënyrë të njëanshme. Këtij konsensualiteti nuk i është bërë asnjë shërbim nga mazhoranca, pasi nuk i është bërë asnjë përpjekje për diskutim. Mazhoranca duhet të heqë njëherë e përgjithmonë dorë nga iluzioni për të miratuar me vota imagjinare apo të blera. Do thellonte në ekstrem krizën politike, që është akoma më e rënduar në situatën e pandemisë që kaluam. Do të krijonte qorrsokak që do të ishte i rëndë për vendin dhe do të rëndonte një situatë që është e vështirë për shkak të pandemisë. Të gjitha taksicizmat për të shtruar në tryezë çështje të tjera, është tendencë që mos t’u jepet përgjigje atyre çështjeve që janë. Të gjitha draftet e opozitës ezaurojnë çështjen e OSBE/OHDIR. Fjala ekspert që ka përdorur zoti Gjiknuri, nuk ka pasur aspak fjalën për ekspert të opozitës. Ata nuk kanë qenë pjesë e lojërave. Sot është momenti që të gjitha gjerat janë në tavolinë. Duhet të themi qartë; ‘po’ dhe ‘jo’ për këto çështje. Kjo është një reformë nul nëse është pa opozitën. Është me tepër se nul, pasi është kthim pas. Ajo do të ishte e detyruar që të përballej me konsekuenca në planin e përbashkët.”, tha Vasili.
