Dje Presidenti Ilir Meta zhvilloi një takim me ambasadorët e Bashkimit Evropian dhe të SHBA-së, ku u ka dorëzuar një platformë me 14 pika për të rikthyer normalitetin në vend. I njëjti propozim i është dorëzuar edhe partive jashtëparlamentare, PD dhe LSI.
Pjesa dërrmuese e draftit dominohet nga zgjidhja e ngërçit në Këshillin e Emërimeve në Drejtësi apo në Gjykatën Kushtetuese, e deri këtu propozimet e Presidentit qëndrojnë brenda kuadrit institucional të vendit. Por nuk ndodh kështu kur flitet për ndryshime në sistemin gjyqësor apo për negociatat e Shqipërisë me Bashkimin Evropian.
Në draft, Meta kërkon që një Këshill Politik (nuk specifikohet nëse kërkohet ngritja e një këshilli të ri apo i referohet këshillit të ngritur për reformën zgjedhore) të marrë vendime për reforma gjyqësore. Ky propozim vjen për herë të parë nga kreu i shtetit, në një kohë kur reforma në drejtësi konsiderohet e përfunduar, ndërkohë që një grupimi jashtë institucioneve do t’i atribuohet e drejta për marrë vendime për sistemin gjyqësor në Shqipëri.
Një tjetër fokus i këtij këshilli të propozuar nga Meta do të jetë edhe dakordësia midis partive politike që, “brenda qershorit të emërojnë Shef-Negociator për anëtarësimin në BE, një ekspert të nivelit të lartë, integriteti, besueshmëria dhe profesionalizmi i të cilit është i pajtueshëm nga të gjitha palët”. Kujtomë se kryeministri Edi Rama njoftoi pak javë më parë se kishte përzgjedhur diplomatin Zef Mazi për të udhëhequr grupin negociator të Shqipërisë, por mesa duket propozimi nuk ka gjetur mbështetjen e presidentit Meta.
Kërkesa e Presidentit për Këshillin Politik mbetet për t’u sqaruar më hollësisht, se kush do të jenë anëtarët, sa do shtrihet funksioni i tij dhe cilat do të jenë çështjet që do miratohen me “unanimitet të plotë”.
Gjithashtu, propozimi i Metës që ky këshill jashtë-institucional të trajtojë ndryshimet ligjore dhe kushtetuese që lidhen me reforma gjyqësore pritet të shkaktojë reagime të forta pasi reforma në drejtësi është miratuar në Parlament me 140 vota.
/k.s-Fjala.al
