Gjykata e Posaçme e Apelit ka shtyrë sërish vendimi për ish-ministrin e Brendshëm Saimir Tahiri e parashikuar për t’u dhënë ditën e sotme.
Mësohet se seanca e radhës për t’u dhënë vendimi është lënë të premten e 26 qershorit në orën 13:00.
Shkak për shtyrjen e dhënies së vendimit është bërë gjyqtari i ri Dhimitër Lara, i cili zëvendësoi gjyqtaren Nure Dreni të shkarkuar nga procesi i vettingut. Mësohet se ai ka kërkuar më shumë kohë për t’u njohur me dosjen “Tahiri”.
Në seancën e zhvilluar më 11 qershor, prokurorët Vladimir Mara dhe Dritan Prenci nuk u tërhoqën nga akuzat për trafikimin ndërkombëtar të lëndëve narkotike dhe dënimi me 12 vite burg që kërkuan në Shkallën e Parë, ndërsa Saimir Tahiri dhe avokati i tij Maks Haxhia kishin përgatitur një mbrojtje prej 131 faqesh.
Përveç Dhimitër Larës, pjesë e trupës gjykuese janë dhe gjyqtaret Albana Boksi dhe Nertina Kosova.
Tahiri u dënua me 5 vite burg, vitin e kaluar, të konvertuara me gjykim të shkurtuar në 3.4 vite shërbim prove dhe dënimi u dha për akuzën “shpërdorim detyre”.
Prokuroria e Krimeve të Rënda nga ana tjetër kërkonte 12 vite burg për Tahirin për 3 vepra penale “trafikim i narkotikëve i kryer në bashkëpunim në formën e grupit të strukturuar kriminal”, “kryerja e veprave penale nga organizata kriminale”, “grup i strukturuar kriminal”.
Si përfundim të dyja palët, si Tahiri dhe Prokuroria nuk pranuan dënimin me 3.4 vite shërbim prove dhe e apeluan zyrtarisht në Gjykatën e Posaçme të Apelit.
Prokuroria e akuzonte Tahirin se në kohën kur ishte ministër i brendshëm bashkë me ish- drejtorin e Policisë Vlorë, Jaeld Çela kanë bashkëpunuar me Moisi Habilajn apo vëllezërit e tij që bashkë korrespondojnë të jenë kushërinj.
Mbetet me interes vendimi i Apelit për të parë se kujt do t’i japë të drejtë./En.Br./Fjala.al
