Nga Enver Robelli
Kjo nuk është ditë për patriotë të rrejshëm. Kur në vitin 2010 u miratua Raporti i Këshillit të Evropës për shumë të zeza të luftës dhe pasluftës, ata që përmendeshin aty duhej të largoheshin menjëherë nga politika. Këtë shans e patën edhe kur gjetjet e Raportit të Këshillit të Evropës u konfirmuan nga një prokuror amerikan. Këtë shans e patën kur filluan përgatitjet ndërkombëtare për themelimin e Gjykatës Speciale. Zgjodhën një rrugë tjetër – atë të sabotimit të drejtësisë, aleancave joparimore, kurtheve politike. U përdorën instrumentet e shtetit të kapur. Drama e dhjetorit të vitit 2017, kur synohej shpërbërja e Gjykatës Speciale (ambasadori amerikan dhe diplomatë të tjerë, duke ndërhyrë gati fizikisht kundër deputetëve), letra dërguar Mike Pompeos etj., janë disa nga këto përpjekje për t’ia lozur lojën bashkësisë ndërkombëtare. Ndërkohë, numri i dëshmitarëve pakësohej. Ata pak dëshmitarë që kanë mbetur janë kryesisht në vendet perëndimore. Kanë pasur kohë për ta shmangur këtë ditë të gjithë – si të prekurit nga njoftimi i sotëm, ashtu dhe partitë politike dhe ata që marrin pjesë në zgjedhje. Populli! Në vend të kësaj disa zgjodhën rrugën e lojërave politike, të tjerët s’treguan largpamësi shtetformuese e shtetndërtuese, e populli votues nuk e gjeti fuqinë për ndryshime cilësore politike. Tash komentet e flakta nuk bëjnë punë. Pas e keni një dekadë pothuaj të humbur. Përgjegjësi politike bartin të gjithë ata që e sollën situatën deri këtu. E, sidomos, ata që sot i mbushin kusitë me lot krokodili. Gati të gjithë e keni ditur çka po bëni. Jo çdokush duhet të shpërblehet me postet më të larta politike. E tash? Të shpresojmë se Kosova do të dalë sa më pak e dëmtuar nga papërgjegjësia e pjesës më të madhe të klasës politike. Një mësim për të ardhmen: hallet personale të politikaneve nuk duhet të shndërrohen në halle shtetërore.
Lexo edhe: Aktakuza e paralajmëruar, Kosova për herë të dytë në dorë të aleatëve
/En.Br./Fjala.al
