Xhaxha dhe nip janë arrestuar nga policia e Lezhës në kuadër të operacionit “Kuruesi i rremë”.
Ata akuzohen se prodhonin ilaçe në mënyrë artizanale dhe ia shisnin qytetarëve me pretendimin se do t’i shëronte nga COVID-19, vihen në pranga nga Policia dy shtetas.
Pas hekurave kanë përfunduar shtetasit Frederik Frrokaj, 57 vjeç dhe nipi i tij, shtetasi Henri Frrokaj, 30 vjeç, banues në Mamurras.
“Shtetasi Frederik Frrokaj, nëpërmjet rrjetit social Facebook bënte thirrje për prodhim të substancave për kurimin e virusit COVID-19 nga një përzierje e acidit klorhidrik me H2O, duke pretenduar se me këtë përzierje kishte shpikur ilaçin për kurimin e këtij virusi. Në kuadër të operacionit u kap në flagrancë në një lokal, nipi i shtetasit Frederik Frrokaj, i cili po i shiste ilaçin një klienti. Po në vijim të operacionit u bë arrestimi edhe i shtetasit Frederik Frrokaj.
Frederik Frrokaj, pasi bënte prodhimin e këtyre medikamenteve në kushte artizanale dhe jashtë kushteve laboratorike, në kushte shtëpie, ia jepte shtetasit Henri Frrokaj, i cili, pasi takonte personat e interesuar, ua shiste atyre kundrejt pagesës 20.000 lekë të reja, me premtimin se shëronin COVID-19.” thuhet në njoftimin e policisë.
Nga kontrolli në banesën e 57 vjeçarit është gjetur baza materiale, medikamente dhe preparate që shërbenin për të përgatitur ilaçin që këta shtetas tregtonin. Në banesën e shtetasit Frederik Frrokaj janë gjetur dhe sekuestruar në cilësinë provës materiale dhe pesë pajisje mjekësore pa faturë tatimore, të cilat dyshohet se mund t’i ketë futur kontrabandë.
Materialet do t’i kalojnë Prokurorisë pranë Gjykatës së Shkallës së Parë Kurbin, për veprat penale “Mashtrimi”, “Prodhimi i kundërligjshëm i artikujve dhe mallrave industrialë e ushqimorë”, “Fshehja e të ardhurave” dhe “Tregtimi dhe transportimi i mallrave që janë kontrabandë”.
/En.Br./Fjala.al
https://youtu.be/qehc7Wn-syI
