Sipas neurokirurgut, Erion Musabelliu asnjë organ nuk është i paprekshëm nga virusi i ri COVID-19, por te disa prej tyre pasojat janë të parikuperueshme, duke përmendur disa prej tyre.
Ai deklaron se është dokumentuar që virusi jo vetëm prek trurin, por pasojat kanë qenë katastrofale. Musabelliu shtoi më tej se organet gjenitale mashkullore kanë një cipë mbështjellëse si cipa e trurit që i ka shërbyer seksit mashkull të mbrohet nga një grup infeksionesh në tërësi po kurrsesi nuk i shpëtojnë infeksionit nga COVID-19.
“Ky virus prek, depërton, transmetohet përmes qelizave të vetë organizmit të njeriut në çdo organ dhe sistem. Nuk ka asnjë organ brenda organizmit të njeriut që ky virus nuk mund të depërtojë. Kalon cipën e trurit dhe infekton trurin, organe të tjera që përfshijnë organet gjenitale. Dua të theksoj se organet gjenitale mashkullore kanë një cipë mbështjellëse si cipa e trurit që i ka shërbyer seksit mashkull të mbrohet nga një grup infeksionesh në terësi po kurrësesi nuk i shpëtojnë infeksionit nga Covid 19.Organe të tjera të prekura janë veshkat, me pasoja, dhe urojmë që këto pasoja të mos jetë afatgjatë. Ne kemi vërejtur shenja dhe dokumentuar nga ana laboratorike që pasojat mund të jenë afatgjatë. Organ tjetër që preket është mëlçia. Edhe truri jo vetëm që preket por pasojat kanë qenë katastrofale. Nëse është instaluar një defiçit nga prekja në një zonë të caktuar të trurit ai defiçit do të jetë i përjetshëm te ky individ. Uroj që kjo të mos jetë situata në organe të tjera të prekura.” tha Musabelliu në “Ora News”.
Dëmtimi i organeve nga virusi sipas mjekut ndodh si te pacientët me simpoma të Covid, ashtu edhe te ata asimptomatikë.
“Infeksioni me Covid-19 te disa pacientë jep shenja klinike, te disa të tjerë jo. Kemi dokumentuar pacientë që nuk kanë pasur simpomatologji klinike, nuk kanë qenë hospitalizuar por është provuar nga testi serologjik që kanë kaluar Covid. Janë vërejtur komplikacione të organeve, konkretisht të veshkës dhe mëlçisë.” tha ai.
/En.Br./Fjala.al
