Ministrja e Arsimit Besa Shahini ka reaguar për ndarjen nga jeta të mësuesit Gjon Kola, 55 vjeç për shkak të COVID-19.
Në një postim në rrjetet sociale, Shahini shpreh dhimbjen dhe respektin për mësuesin Kola dhe uron shërim të shpejtë për arsimtarët e tjerë që janë të prekur nga ky virus.
Ministrja bën apel për zbatimin e të gjitha masave për t’u mbrojtur nga COVID-19.
Postimi i plotë:
Mora lajmin e hidhur që një nga mësuesit tanë të nderuar në qytetin e Rrëshenit ka humbur sot betejën me COVID-19.
Shpreh dhimbjen dhe respektin për këtë mësues të vyer e me përvojë dhjetëra vjeçare, si për stafin e shkollave ku ai ka dhënë mësim, ashtu dhe për nxënësit që ai ka edukuar ndër vite.
Ndaj këtë dhimbje me familjarët e mësuesit Kola, me nxënësit dhe kolegët e tij.
Dua të theksoj edhe një herë nevojën që gjithsecili prej nesh të zbatojë sa më me rigorozitet të gjitha masat e nevojshme për tu mbrojtur nga ky virus i pabesë dhe i padukshëm.
Çdo jetë e juaja dhe e familjarëve tuaj është e shenjtë dhe duhet mbrojtur nga të gjithë ne si shoqëri, prandaj të respektojmë me rigorozitet të gjitha protokollet shëndetësore.
Uroj SHËRIM TË SHPEJTË edhe për arsimtarët e tjerë që janë prekur nga ky virus.
/En.Br./Fjala.al
