Ministri i Bujqësisë Bledi Çuçi ka publikuar në faqen e tij të “Facebook” foto nga gjuetia me flotën e peshkimit “Rozafa”, më e madhja në vend dhe në Mesdhe kur është fjala për gjuajtjen e pelagjikëve.
Komenti i plotë i Bledi Çuçit
Një natë në Adriatik me flotën e peshkimit “Rozafa”, më e madhja në vend dhe në Mesdhe kur është fjala për gjuajtjen e pelagjikëve.
Rritja e sektorit të peshkimit në Shqipëri është impresionuese dhe aspak e rastësishme, por rezultat i politikave tona, si dhe dëshmi e pakontestueshme e transformimit të madh që ka pësuar ky sektor.
Prej 6 vitesh peshkatarët e marrin naftën pa taksa. 
Po kështu blejnë rrjetat dhe materialet e tjera që iu duhen pa TVSH. 
Sot një litër naftë blihet me çmim burse në rreth 40 lekë, ndryshe nga 6 vite më parë që blihej me çmim tregu në rreth 170 lekë. 
Falë këtyre lehtësive fiskale, por edhe investimeve në infrastrukturë siç është porti i peshkimit Durrës etj, eksporti i peshkut dhe prodhimeve të detit është rritur me 3.25 herë më shumë krahasuar me vitin 2013. 
Vetëm gjatë vitit 2019 vlera e eksporteve të sektorit të peshkimit ishte rreth 100 milionë Euro. 
Rritja e këtij sektori nuk është ndalur as nga pandemia e Covid 19.
Në 6 muajt e parë të këtij viti eksportet janë rritur në vlerë me 24.5%. Qeveria së bashku me Bashkimin Europian do të vënë në dispozicion një grant prej 1.5 milion euro për të subvencionuar 50% të shpenzimeve për rinovimin e të gjithë pajisjeve për anijet e peshkimit.
Çdo mbështejte për këtë sektor është një investim i sigurt që krijon vlerë të shtuar në ekonomi. 
“Rozafa” nuk është thjesht një sipërmarrje e një njeriu të jashtëzakonshëm si Gjergj Luca, por edhe një krenari kombëtare për të gjithë shqiptarët. Bravo Gjergj!
