Presidenti i SHBA, Donald Trump ka sulmuar Kinën duke e fajësuar për pandeminë e Covid-19.
Gjatë fjalës së tij në OKB, teksa fliste për “armikun e padukshëm” Trump u shpreh ndër të tjera se “ne duhet ta bëjmë Kinën përgjegjëse, ajo ka përhapur fatkeqësinë Covid në botë”. Ai befasoi Asamblenë e OKB me një fjalim të regjistruar në Shtëpinë e Bardhë dhe që zgjati shumë më pak se 15 minutat e rezervuara për secilin udhëheqës në debatin e përgjithshëm. Fjalimi i tij ishte pothuajse plotësisht i përqendruar në sulmin ndaj Kinës.
“Unë jam krenar që e vendosa Amerikën të parën”, tha presidenti amerikan.
“Shtatëdhjetë e pesë vjet pas përfundimit të Luftës së Dytë Botërore dhe themelimit të OKB, ne jemi përsëri të angazhuar në një betejë globale. Në Shtetet e Bashkuara kemi filluar mobilizimin më agresiv që nga Lufta e Dytë Botërore”, vazhdoi presidenti amerikan, duke pretenduar se është bërë përparim në ndërtimin e pajisjeve të frymëmarrjes së drejtuar, trajtimeve dhe vaksinave, tre prej të cilave “kanë arritur fazat e fundit të eksperimentimit”, ndërsa miliona doza tashmë janë duke u prodhuar.
“Ne do të shpërndajmë vaksinën, do të mposhtim virusin dhe do t’i japim fund pandemisë. Ne do të hyjmë në një epokë prosperiteti, paqeje dhe bashkëpunimi të paparë”, përfundoi Trump.
E menjëhershme ka qënë përgjigja ë Pekinit zyrtar.
“Pandemia duhet të përballet së bashku, të bashkuar dhe duke ndjekur shkencën. Çdo përpjekje për të politizuar ose stigmatizuar pandeminë duhet të hidhet poshtë”.
Kështu u shpreh përmes një video të regjistruar paraprakisht Presidenti kinez Xi Jinping në asamblenë e përgjithshme të OKB.
Pa.Va/Fjala.al
