Policia ka vënë në pranga një 26-vjeçar në Shkodër pasi shpërndante kokaine me doza të vogla. 26-vjeçarit më iniciale S. RR . i janë gjetur 35.200 lekë dhe dy aparate celulare./Jo.Be/Fjala.al
Njoftimi i policisë:
Forca e posaçme “Shqiponjat” kanë goditur një rast të shpërndarjes së drogave të forta duke arrestuar në flagrancë një 26-vjeçar.
Nga forca e posaçme “Shqiponjat”, në bashkëpunim me Seksionin për Hetimin e Trafiqeve dhe Narkotikëve në DVP Shkodër, si rezultat i kontrolleve të shtuara për parandalimin dhe goditjen e veprimtarisë së kundërligjshme, bazuar edhe në informacionet e marra në rrugë operative se një 26-vjeçar shpërndante kokainë në doza të vogla, kanë organizuar punën për lokalizimin dhe kapjen e tij.
Si rezultat u bë arrestimi në flagrancë i shtetasit S. RR. 26 vjeç, banues në lagjen “Naim Gjylbegu”, Shkodër.
Arrestimi i këtij shtetasi u bë pasi në vendin e quajtur “Dergut”, lagjja “Naim Gjylbegu”, Shkodër, forca e posaçme “Shqiponja” e DVP Shkodër, pas kontrollit të ushtruar në mjetin e tij tip “Mercedez Benz” i kanë gjetur 10 doza me lëndë narkotike kokainë, të cilat u sekuestruan në cilësinë e provës materiale.
Në vijim të kontrollit fizik të ushtruar shtetasit S. Rr. i janë gjetur 35.200 lekë dhe dy aparate celular. Materialet i kaluan Prokurorisë, për veprime të mëtejshme.
