Kur kanë mbetur edhe dy ditë nga mbyllja e aplikimeve për tu bërë pjesë e BKH-së, e njohur si “FBI-ja shqiptare”, deri më tani për të qenë pjesë e kësaj strukture kanë shfaqur interes 165 persona.
Mësohet se aplikantët janë, oficerë policie, oficerë të policisë gjyqësore dhe juristë. Burime për “Fjala”, bënë me dije se gjatë 48 orëve të ardhshme, kur edhe aplikimet mbyllen zyrtarisht pritet që ky numër të rritet. Të njëjtat burime shtojnë se numri më i madh i aplikantëve vjen nga rradhët e policisë.
Pas mbylljes së aplikimeve, do bëhet përzgjedhja e atyre që plotësojne kriteret ligjore, e më pas gara për të zënë një nga 60 vendet si hetues në institucionin më të ri të drejtësisë shqiptare do të kalojë edhe faza të tjera, si testimi me shkrim, testi psikologjik dhe ai i poligrafit. Nga kjo listë do përzgjidhet edhe nëndrejtori i BKH-së.
Byroja Kombëtare e Hetimit është njësia hetimore e Strukturës së Posaçme Anti-Korrupsion (SPAK) dhe ka një ngjashmëri me Byronë Federale të Investigimit (FBI), e cila heton krime të nivelit të lartë në Shtetet e Bashkuara.
Për këtë arsye hetuesit dhe drejtuesi i BKH-së do të trajnohen për tre muaj në akademinë e FBI-së në Virxhinia. Pak ditë më parë drejtuesja e BKH-së Aida Hajnaj garantoi se ky proces do të udhëhiqet nga transparenca për të përzgjedhur hetuesit më të mirë./Bl.Ba/Fjala.al