Shtetet e Bashkuara të Amerikës kanë shënuar një rekord të rasteve të reja. Përgjatë 24 orëve të fundit në SHBA janë konfirmuar 82.000 raste të reja duke kaluar shifrën e 76.000 rasteve të shënuara më 16 korrik.
Sipas statistikave të publikuara nga autoritetet vendase rreth 41.000 të infektuar janë duke u kuruar në spitale, duke shënuar një rritje me 41% të shtrimeve në spitale në krahasim me një muaj më parë.
Sipas një studimi të ri të publikuar nga Instituti i Statistikave Shëndetësore të Universitetit të Washington-it, shifrat e viktimave më SHBA do të arrijnë mbi 500.000 deri në muajin shkurt, nëse qytetarët nuk mbajnë maska. Nëse 95% e amerikanëve vënë maska, mund të shpëtohen 130,000 jetë, thotë instituti.
Në Evropë situate paraqitet gjithashtu alarmante. Agjencia e Bashkimit Evropian për kontrollin e sëmundjeve mbështeti paralajmërimin e OBSH-së lidhur me rritjen e rasteve të reja me Covid-19 në Evropë. OBSH-ja më herët është shprehur se numri i të infektuarve mund të rritet ndjeshëm.
Drejtoresha e agjencisë evropiane për kontrollin e sëmundjeve Andrea Ammon tha se Evropa përballet me një kërcënim serioz ndaj shëndetit publik dhe me një “situate shumë shqetësuese epidemiologjike”.
Të gjitha vendet e BE-së përveç Qipros, Estonisë, Finlandës dhe Greqisë janë në kategorinë “rrezik i lartë”, thotë agjencia. Në Gjermani, numri i viktimave ka shkuar në mbi 10,000 persona, ndërsa numri i infektimeve ka arritur në mbi 418,000. Rusia nga ana tjetër raportoi 16,521 raste të reja me koronavirus./Re.Gu/Fjala.al
