Ministrja e Ekonomisë dhe Financave, Anila Denaj ka prezantuar të hënën projekt-buxhetin e vitit 2021 duke dhënë shpresa për një rimëkëmbje të ekonomisë.
Para Komisionit të ekonomisë, Denaj tha se ka premisa që ekonomia shqiptare të rimëkëmbet në 2021 pasi goditjeve nga tërmeti dhe pandemia në 2020.
“Gjithashtu duke marrë në konsideratë që fondametet kryesore të ekonomisë nuk do të pësojnë ndonjë goditje problematike, presim që rritja për 2021 të rikthehet në nivelin e rreth +5.5% dhe më pas të konvergojë dhe stabilizohet afër nivelit + 4% (nivel i cili ne vlerësojmë është dhe rritja potenciale e ekonomisë sonë për periudhën afatmesme në vijim). Rritja ekonomike përgjatë periudhës 2021-2023 pritet të gjenerohet kryesisht nga kërkesa e brendshme, si konsumi privat ashtu edhe investimet”, u shpreh Ministrja.
Referuar pritshmërive të 2021, Ministrja Denaj vlerësoi se ekzistojnë premisat e duhura për një rekuperim të rritjes ekonomike, që prej vitit të ardhshëm.
“Në vitin 2021, të ardhurat totale të buxhetit parashikohen të arrijnë 479 miliardë lekë, ose 10.6 % më shumë se i pritshmi i vitit 2020. Shpenzimet Buxhetore për vitin e ardhshëm janë programuar në nivelin e 587.6 miliardë lekë ose 34.9% e PBB, me rritje në terma nominalë me rreth 8 miliardë lekë krahasuar me Aktin Normativ të Buxhetit të vitit 2020.
Buxheti 2021 do të vijojnë të mbështesë sektorët prioritarë si: arsimi, shëndetësia, bujqësia, infrastruktura, si dhe mbështetjen e plotë të procesit të rindërtimit nga tërmeti i 26 nëntorit, të cilat të marra së bashku garantojnë stimuj pozitivë për rritjen ekonomike të vendit në periudhën 2021-2023 e përtej duke gjeneruar njëkohësisht punësim të qëndrueshëm”, u shpreh Denaj.
Ndërkohë më herët, Banka Botërore është shprehur se për këtë vit ekonomia në Shqipëri do të bjerë 8.4% këtë vit.
Pa.Va/Fjala.al
