Shqipëria u anëtarësua në NATO më 1 prill 2009. Sot kjo aleancë ka 30 shtete anëtare, por ajo që vlen të theksohet përveç synimit që ka NATO, është edhe buxheti që shtetet anëtare duhet të kenë për mbrojtjen. Kështu NATO ka vendosur që Shqipëria të ketë 2 për qind të buxhetit të shtetit të dedikuar mbrojtjes. Kjo nuk është plotësuar asnjëherë. Ditët e fundit ministrja e Mbrojtjes Olta Xhaçka proklamoi në komisionin parlamentar të Sigurisë që buxheti i vitit 2021 do ishte 1.5 për qind e buxhetit të shtetit. Xhaçka tha se në vitin 2022 ky buxhet do ishte 1.75 për qind dhe në vitin 2023 do ishte 1.85 për qind. Po përse Shqipëria nuk e plotëson kushtin e NATO-s me 2 për qind? Ish-ministri i Mbrojtjes Gazmend Oketa tha për emisionin HARD TALK NGA ROLAND QAFOKU, se kjo është një shifër shumë e lartë.
-Do doja një përcaktim tuajin për mënyrën si është menaxhuar ministria e Mbrojtjes në qeverisjen e PS me dy zonjat e para në krye të kësaj ministrie, Mimi Kodhelin dhe Olta Xhaçkën, por edhe për atë që është debat lidhur me buxhetin e ministrisë së Mbrojtjes në kuadër si anëtare e NATO-s. Objektivi është 2% . Zonja Xhaçka ka deklaruar se për vitin 2021 do jetë 1.5% e PBB.
-Është një çështje e cila për hir të së vërtetës është diskutuar vazhdimisht. Duhet ta pranojmë që për një vend si Shqipëria është një objektiv i rëndësishëm. Në kohën kur isha unë, duhet të tregohem i sinqertë përdoreshin edhe disa instrumente financiarë për ta bërë që të ishte afër 2%. Ka pasur një zë i cili normalisht nuk duhej llogaritur, i cili ishte zëri i pensioneve. Përfshiheshin edhe pensionet e ushtarakëve.
-A duhet të përfshihet te buxheti?
-Jo nuk duhet të përfshihet. Megjithatë duhet të jemi koshient që nëse e përkthen atë shifër në vlera absolute është shumë./Fjala.al/Ke.Ba
