Ish-zëvendëskryeministri dhe ish-ministri i Mbrojtjes Gazmend Oketa zbulon pas 10 vjetësh përgjimet e Wikileaks që lidhen me bisedat e tij me ambasadorin amerikan John Withers. Gjatë emisionit HARD TALK NGA ROLAND QAFOKU, Oketa tha se Wikileaks publikoi në atë kohë një bisedë të tij me ambasadorin amerikan që lidhej me plotësimin e kushtit që Shqipëria duhet të plotësonte me 2 për qind të buxhetit të Shqipërisë për mbrojtjen. Oketa ka këmbëngulur te Withers që të mos kishte manipulime të shifrave dhe se kjo shifër të mos arrihej me sforcim.
-T’iu them të drejtën ka dalë dhe në ato dokumentet e Wikileaks-it kjo që unë kam deklaruar në atë kohë. Unë kam bërë një deklarim në mbledhjet ku diskutonim për buxhetin, por edhe një bisedë me ish-ambasadorin amerikan Withers ku i kam thënë që pavarësisht se është angazhimi në raport me NATO-n prej 2% gjykoj se është e vështirë që me mundësitë që kemi ta arrijmë këtë. Kam pasur kurajon t’i them që unë do preferoja që ne të mos abuzonim me këto fonde në sensin që në momentin që ne nuk kemi kapacitete për t’i tenderuar, për t’i menaxhuar siç duhet, do preferoja që këto para të shkonin në ndërtimin e ujësjellësave, shkollave, kopshteve, të alokoheshin në një ministri tjetër./Fjala.al/Ke.Ba
