Komisioni i Posaçëm për informimin në lidhje me gjetjet për raportin e ‘Dick Marty’ është mbledhur ditën e sotme. Kryetari i këtij komisioni, Ulsi Manja tha se kanë ardhur dy raporte sekrete nga SHISH dhe ministria e Jashtme dhe se do të shqyrtohen.
“Janë depozituar 2 dokumente sekrete nga SHISH dhe Ministria e Jashtme. Është dorëzuar dokumentacioni i kërkuar nga Ministria e Drejtësisë dhe ajo e Brendshme. Kanë dorëzuar dokumentacionin e kërkuar Prokuroria e Përgjithshme dhe Ministria e Jashtme”, tha Manja.
Klodilda Bushka tha se në fakt kanë ardhur dokumente voluminoz që do të kërkojë kohë dhe punë në shqyrtimin e tyre.
Ky komision është miratuar nga Kuvendi i Shqipërisë për administrimin e dokumentacionit dhe hartimin e një raporti përmbledhës dhe informues për gjetjet dhe konkluzionet, që kanë nxjerrë verifikimet e kryera nga institucionet përkatëse në Shqipëri për çështjet e raportit të Dick Marty për krimet e luftës në Kosovë, që implikonte UÇK-në por edhe shtëpinë e verdhë në Mat të Shqipërisë ku pretendonte se në të kryhej trafik organesh.
