Me 3 takimet e luajtura të dielën, është mbyllur edhe java e 26-të e Kategorisë Superiore, e cila, sidoqoftë, pas dy ndeshjeve të së shtunës, e ka lënë të ngjeshur kreun e renditjes, por ka edhe një risi. Kjo sepse Tirana, “kampione” në fuqi, shpreson ende te titulli dhe tashmë numëron 5 pikë më pak se Teuta dhe Vllaznia, kurse zona e Kupat të Evropës është vetëm tre pikë larg.
Bardheblutë janë në këtë situatë pas një tjetër fitoreje, këtë herë kundër Apolonisë me rezultatin 5-2 në Stadium “Arena Kombëtare”. Një ndeshje që pati plot 7 gola dhe skuadra kryeqytetase e pa veten edhe në disavantazh. Tirana e zhbllokoi ndeshjen 19 minuta nga nisja e ndeshjes, pas një goditjeje dënimi të Idriz Bathës. Por festa bardheblu nuk zgjati shumë.
Levendi fillimisht barazoi dhe në minutat shtesë të pjesës së parë e kaloi Apoloninë në epërsi. Tirana në pushim mori këshillat e trajnerit Shehi dhe barazimi erdhi pas një gabimi të miqve, që u shfrytëzuar nga Seferi, i cili pasoi për argjentinasin Torasa. Më pas, Tirana fitoi një 11-metërsh që u kthye në gol nga Batha, kurse Ismajlgeci dhe Kale vulosën fatet e këtij dueli me dy gola të tjerë që futën fitoren në “kasafortë”.
Të dielën u luajt edhe në Elbasan, aty ku Kukësi u zhyt në krizë nga Skënderbeu. Korçarët morën fitoren e dytë radhazi, falë një goli të shënuar nga Mensah në pjesën e dytë. Tashmë Bylisi, që nuk shkoi dot më larg se një barazim 1-1 në shtëpi me Kastriotin në ndeshjen e luajtur pasdreke, është vetëm katër pikë larg dhe skuadra e Memellit do mundohet që të sigurojë qëndrimin në Superiore, kurse Kukësi në vijim mund të rrezikojë edhe zonën e “play-out”-it.
