Kryeministri i Kosovës Albin Kurti është pritur sot nga presidenti francez, Emmanuel Macron, në Pallatin Presidencial Elysee.
Sipas një deklarate për mediat nga Zyra e Kryeministrit, takimi bilateral mes Kurtit dhe Macronit ka përfunduar.
Në komunikatë thuhet se gjatë takimit u diskutua për rëndësinë e bashkëpunimit rajonal dhe të ardhmen evropiane, si dhe sfidën e përbashkët në ballafaqimin me pandeminë COVID-19.
“Gjatë takimit u bisedua për rëndësinë e bashkëpunimit rajonal dhe të ardhmen evropiane, si dhe sfidën e përbashkët në ballafaqimin me pandeminë COVID-19”, thuhet në komunikatë.
Ndërsa zëvendëskryeministrja Emilija Rexhepi, ka thënë se në takim u diskutua për dialogun Kosovë-Serbi, edhe pse në komunikatë nuk përmendet diçka e tillë.
“Kemi pasur një takim shumë miqësor, më shumë se një orë me presidentin Macron, një takim shumë të sinqertë. Kemi diskutuar për mundësinë që Kosova të furnizohet me vaksina anti-COVID, për më shumë investime nga Franca në Kosovë, për arsimin, liberalizimin e vizave si prioritet i Qeverisë Kurti, dialogun me Serbinë dhe rrugën më të lehtë për në Bashkimin Evropian”, ka bërë të ditur Rexhepi për Telegraf.
