Komandanti i Misionit të NATO-s në Kosovë, KFOR-it, Ozkan Ulutas, i ka dhënë fund pasigurisë nga një sulm i mundshëm ushtarak i Serbisë në territorin kosovar.
Në një intervistë Ulutas është shprehur se KFOR-i përpos vigjilencës së lartë që ka dhe përditësimit në kohë reale, është i përkushtuar të parandalojë çdo rrezik të përshkallëzimit.
“Ne vazhdimisht monitorojmë të gjitha zhvillimet relevante që mund të ndikojnë në sigurinë në mbarë Kosovën dhe stabilitetin rajonal.
KFOR-i ka burime të mira dhe është krijuar për t’u përballur me të gjitha sfidat që mund të ndikojnë në mjedisin e sigurisë”,- është shprehur ai.
Pyetjes se a pritet që numri i trupave të NATO-s në Kosovë të rritet, Utulas i është përgjigjur duke thënë se KFOR-i është në çdo moment i pajisur mirë dhe i vendosur për të vazhduar zbatimin e mandatit të tij si reaguesi i tretë i sigurisë.
“Ne gjithmonë do të sigurojmë që misioni ynë të mbetet i pajisur mirë dhe i vendosur mirë për të vazhduar zbatimin e mandatit të tij si reaguesi i tretë i sigurisë, në bashkëpunim të ngushtë me Policinë e Kosovës dhe Misionin e BE-së për Sundimin e Ligjit (EULEX)”,-ka theksuar ai./kb
