ISIS ka njoftuar sulme të reja në Europë duke përfituar nga mundësia, pasi perëndimi është i preokupuar nga lufta në Ukrainë.
Grupi terrorist u tha gjithashtu anëtarëve të vet që të hakmerreshin për vdekjen e liderit Abu Ibrahim al-Hachimi al-Qurashi i cili u vra në shkurt të këtij viti në një bastisje nga forcat speciale amerikane në Siri dhe të fillonin sulme kundër Evropës dhe Izraelit ndërsa “kryqtarët po luftojnë njëri-tjetrin”.
Zëdhënësi i ri i Shtetit Islamik Abu-Omar al-Muhajir tha se pushtimi rus i Ukrainës ka ‘preokupuar’ shtetet jomuslimane dhe paraqet një shans për të nisur ofensivën. Në një fjalim të publikuar në internet, të mbajtur gjatë muajit të shenjtë të Ramazanit, al-Muhajir u kërkoi xhihadistëve të ISIS-it të hakmerreshin për vrasjen e al-Qurashi.
“Ne po shpallim, duke u mbështetur tek Zoti, një fushatë të bekuar për t’u hakmarrë,” tha al-Muhajir dhe u bëri thirrje ndjekësve dhe anëtarëve të Shtetit Islamik që të përfshihen në sulme duke përdorur “mundësinë” e “luftës së kryqëzatave”, një term i përdorur më parë nga grupi terrorist për të përshkruar konfliktin midis Rusisë dhe Ukrainës, raporton Le Figaro.
