Trupat ruse që refuzojnë të luftojnë në Ukrainë, duke mos iu bindur kështu urdhrave tani mund të përballen me 10 vjet burg, shkruan skynews. Ligji i ri u nënshkrua nga presidenti rus Vladimir Putin të shtunën dhe u miratua në fillim të javës nga parlamenti.
Megjithatë, ka pasur raporte të shumta që ushtarët rusë po refuzojnë të luftojnë ndërsa disa po largohen nga vendi për të shmangur dërgimin me forcë në Ukrainë.
Sakaq, presidenti ukrainas Volodymyr Zelensky ka thënë se, “Putini me vetëdije dërgon qytetarët rusë të vdesin”.
Në video-mesazhin e tij të fundit, ai iu bëri thirrje rusëve që të shpëtojnë nga “mobilizimi kriminal ”. Duke folur në rusisht në mesazhin e tij të zakonshëm të mbrëmjes, udhëheqësi i Kievit tha se komandantëve rusë nuk i intereson fare jeta e njerëzve të tyre.
“Është më mirë të mos pranosh një thirrje se sa të vdesësh në një tokë të huaj si kriminel lufte. Është më mirë t’i shpëtosh mobilizimit kriminal sesa të përgjigjesh në gjykatë për pjesëmarrjen në një luftë agresive,” shtoi ai.