Policia e Tiranës ka vënë në pranga ditën e sotme 2 shtetas dhe ka proceduar penalisht dy të tjerë pasi kanë dhunuar mjeken dhe kanë thyer dyer dhe dritare të një spitali.
Burime bëjnë me dije se ngjarja ka ndodhur ditën e djeshme tek infektivi.
Igli Spahija dhe K. S., 50 vjeç kanë pasur vëllain të shtruar në infektiv, i cili ka qenë i prekur me COVID-19, por veç saj ka pasur dhe sëmundje të tjera bashkëshoqëruese.
Mbrëmjen e djeshme viktima ka pësuar atak kardiak ku dhe ka humbur jetën.
Pas kësaj ngjarje shtetasit Igli Spahija, 41 vjeç dhe Bledar Bali, 54 vjeç, së bashku me 3 personat e tjerë që janë proceduar penalisht kanë hyrë në ambientet e spitalit duke u konfliktuar fillimisht me policin privat të infektivit që qëndronte jashtë spitalit dhe më pas me mjekë e infermier.
Këta të fundit ata i kanë akuzuar se nuk kanë përdorur mjekimet e duhura për viktimën.
Pas kësaj ngjarje ka reaguar dhe Ministria e Shëndetësisë, e cila e konsideron të patolerueshmë dhunën ndaj personelit mjekësor.
Reagim mbi ngjarjen e ndodhur në Spitalin Infektiv
Ministria e Shëndetësisë dhe Mbrojtjes Sociale dënon ashpër dhunën e ushtruar ndaj ekipit të mjekëve dhe infermierëve në Spitalin Infektiv, të cilët kanë qenë në krye të detyrës, duke reanimuar një pacient në gjendje të rëndë, teksa janë goditur dhe dhunuar nga familjarët e pacientit.
MSHMS e konsideron të patolerueshëm çdo akt dhune ndaj personelit shëndetësor dhe inkurajon organet e drejtësisë të çojnë deri në fund zbardhjen e kësaj ngjarjeje, duke çuar para drejtësisë autorin/autorët që kanë ushtruar dhunë ndaj mjekëve dhe infermierëve në detyrë.
Ministria e Shëndetësisë dhe Mbrojtjes Sociale siguron qytetarët se shërbimi mjekësor është garantuar dhe do të vijojë të garantohet për çdo qytetar nga personeli shëndetësor i kualifikuar. MSHMS mbështet stafin mjekësor që shërben çdo ditë me përkushtim e profesionalizëm për pacientët dhe dekurajon çdokënd që nxit gjuhën e urrejtjes ndaj mjekëve dhe infermierëve.
