Këto pushime verore që po afrojnë do të jenë edhe më “të kripura” se vjet. Shtrenjtimit të ushqimeve, pijeve e kostove të transportit këtë sezon i është shtuar edhe kosto e rritjes së pagave të punonjësve duke e çuar faturën totale në rreth 10 për qind më të lartë se verën e shkuar.
“Rritje do të ketë, por në nivele më të ulëta nga sa ndodhi vjet, është kthyer në një lloj trendi të përvitshëm, sigurisht ndikuar edhe nga normat inflacioniste që janë më të larta nga sa raportohet zyrtarisht.
Nuk duhet të harrojnë se ngjashëm po ndodh edhe në botë. Mjafton t’i referohemi Turqisë”, tha Rrahman Kasa, Unioni Turistik Shqiptar.
Kështu, një natë qëndrimi në 10 korrik për dy persona në Shëngjin, Velipojë e Durrës nis nga 5 mijë e 800 e deri në 7 mijë e 300 lek.
Sa më në jug, aq edhe më shumë shtrenjtohen çmimet me Ksamilin, Palasën, Sarandën e Dhërmiun në të cilat një çift duhet të shpenzojë nga 11 mijë deri në 14 mijë lekë për të qëndruar një natë.
Çmimet e rritura kanë ardhur kryesisht si pasojë e shtrenjtimit të kostot së akomodimit në hotele, apartamente apo shezlong në plazh.
Gjithashtu, pijet alkoolike, ushqimet dhe transporti i tyre japin kontributin e tyre në rritjen e kostove të paketave turistike.
“Nga shtrenjtimi do të preken kryesisht rezervimet aty për aty. Rezervimet e mëhershme, për të cilat ka tarifa fikse thuajse nuk lëvizin. Kur aty ka ndryshim çmimesh, ndodh vetëm me mirëkuptim”, tha Rrahman Kasa, Unioni Turistik Shqiptar.
Me gjithë shtrenjtimet, Shqipëria vijon të ofrojë çmime më të ulëta se vendet europiane e madje Rajonit.
Sipas platformës Airbnb, një çift mund të akomodohet në plazhet e vendit për mesatarisht 75 euro, shifër kjo më e ulët se ajo që një turist do të duhej të paguante në Turqi, Malin e Zi, Greqi, Itali apo Maltë.
