Autorja dhe moderatorja e “Top Story”, Grida Duma, ishte mëngjesin e kësaj të marte e ftuar në emisionin e “Wake Up”. Gjatë intervistës, Duma foli për përballjen me ish-kryeministrin, Sali Berisha, në studion e saj.
E pyetur nga Blendi Salaj se ‘çfarë do t’i thoshte sot Berishës’, Duma tha: “Unë nuk do të doja kurrë që individi që krijoi një Parti Demokratike, që hodhi Murin e Berlinit në Shqipëri, të mund të vijonte një betejë për figurën dhe respektin individual të tij”
Grida Duma: Edhe me Berishën ka qenë e njëjta gjë. Presupozohej që unë në mënyrë normale, një njeri sidomos në situatat e tij, me vështirësitë që ka ai shumë atipike dhe specifike në këto momente, do të dukej sikur ose do të duhej që të mos godisja…
Blendi Salaj: Si një ish-bashkëpunëtore e tij
Grida Duma: Sigurisht. Si një njeri që hyra në politikë në qeverisjen e Berishës, padiskutim. Por ajo që i thashë ‘a duhet që Partia Demokratike të ketë moshën biologjike të Sali Berishës’, unë besoj që është goditja më e madhe që i është dhënë atij në publik drejtpërdrejtë. Pavarësisht se është thënë qetësisht nga unë.
Blendi Salaj: Çfarë do i thoshe sot Grida, në dritë edhe të lajmeve të fundit
Grida Duma: Por sot do ti thoja që këto beteja ia kemi parë, i ka parë gjithë opinioni publik dhe qytetarët shqiptarë. Unë nuk do të doja kurrë që individi që krijoi një Parti Demokratike, që hodhi Murin e Berlinit në Shqipëri, të mund të vijonte një betejë për figurën dhe respektin individual të tij.
Do ishte mirë që në këto momente, këto çështje t’i rrinin drejtësisë dhe vetëm. Dhe stabilishmenti politik opozitar të kishte një qasje me më shumë higjienë. Pa përjashtuar fare që Berisha është aty ku është. Por një formulë e cila e çliron nga solidariteti me situatën e Berishës si individ, duhej të ishte.
Dhe unë këtë i kam thënë gjithmonë Blend. Duhet të ketë një ulje në tryezë të të gjithë faktorëve të mëdhenj të politikës së të djathtës, të cilët të dakordësojnë një zgjidhje për këtë çështje. Nuk mund të jetë sot çështje ‘je me Berishën, nuk je me Berishën’, sepse të gjithë pothuajse e kanë treguar që ia njohin peshën Berishës elektorale dhe le të themi të kronologjisë historike.
Sot diskutimi është ‘sa Berisha e njeh peshën që shkakton ai në këtë betejë që nuk është vetëm e drejtësisë, por në fund është edhe elektorale’./ S.M
