Kryetari i Bashkisë Tiranë, zoti Erion Veliaj ka shpërndarë sot banesat për 25 familje të cilat u prekën nga tërmeti i vitit 2019.
Banesat e mobiluara dhe me infrastrukturat e nevojshme rrugë, kanalizime, ndriçim, u mundësuan nga Bashkia Tiranë në bashkëpunim me fondacionin “Firdeus”.
Veliaj, së bashku me Elvis Naçin dhe Toni Gogun ishin sot të pranishëm në Pezë, aty ku ata i rikthyen buzëqeshjen banorëve të prekur nga tërmeti. Zoti Veliaj u shpreh se ky do të jetë një fillim i ri për të gjithë banorët.
“Me këtë ditë mbyllim edhe një maratonë. Ka qenë një maratonë 5-vjeçare për të mbyllur të gjithë historinë e tërmetit. Kemi mbyllur një lagje të ngjashme në Ndroq, ku kemi akomoduar një pafundësi familjesh. Kemi bërë të njëjtën gjë në Vaqarr, sapo mbaruam punë në Zall-Herr dhe Baldushk, edhe aty kemi futur familjet e reja. Më vjen mirë që ëmbëlsira ngeli për në fund për ata miq, vëllezër, motra, e familje që kanë kaluar shumë vuajtje, që sot e kanë zgjidhur me këtë investim të jashtëzakonshëm të Fondacionit “Firdeus” edhe të bashkisë tonë”, tha Veliaj./E.T
