Tregimi i sotëm i gazetares Rudina Xhunga u bë në shëtitoren më të re të Tushemishtit, në mes të liqenit, me Pandin e Milleniumit.
Pandi Llakmani, dikur mësues i gjuhës ruse, ka krijuar një oazë në mes të Tushemishtit. Jetën e tij ia ka kushtuar të gjithën kësaj oaze që dimër e verë rri plot me turistë, kryesisht të huaj.
“Unë jam i pari që kam hapur një hotel në Tushemisht dhe në Pogradec. Mua më erdhi fati me këtë shëtitore që bëri qeveria përpara Milleniumit. Kjo shëtitore ka shtuar edhe vizitorët në hotel. Megjithëse në çdo ditë kemi turistë të huaj.”, thotë Pandi.
Pandi shpreh edhe një shqetësim që në fakt e kanë shumë sipërmarrës në Shqipëri, mungesën e punëtorëve profesionistë.
“Unë kam punëtorë në hotel. Ama ka dhe mungesa, sidomos për profesionistë. Jam i detyruar t’i marr nga rruga dhe t’i mësoj. Sepse profesionistët kanë emigruar jashtë.”, thotë ai.
Ka apo jo profesionistë, në tavolinat e Millennium-it nuk mungojnë gatimet tradicionale të Tushemishtit dhe Pogradecit.
Prandaj është edhe hoteli i preferuar i kryeministrave shqiptarë, nga Nano, te Meta dhe Berisha e Rama që kanë shijuar ushqimin dhe pamjen e bukur që ka hoteli me liqenin përballë, të zbukuruar akoma më shumë nga shëtitorja.
“Te Milleniumi ka qenë Fatos Nano, Sali Berisha, Ilir Meta, Edi Rama kanë konsumuar dreka dhe darka në hotelin tim.
Edi Rama më ka vlerësuar shumë. Me sjelljet e tij kam kuptuar që e do punën dhe do patjetër që të përmirësohemi, në infrastrukturë sidomos. Prandaj ndërtoi dhe këtë shëtitore.”, thotë Pandi i Tushemishtit.
Kur të vesh në Tushemisht, shko te Millenium, konsumo një drekë apo darkë me ushqime tradicionale dhe pamjen nga liqeni!/ S,M