Në gjyqin e bujshëm vijon dëshmia dhe ballafaqimi i të penduarit të drejtësisë, Nuredin Dumani me të pandehurit e çështjes dhe avokatët mbrojtës të tyre, ku iu përgjigj pyetjeve mbi rrethanat e ngjarjeve të ndryshme.
Tiranë– Po zhvillohet sot seanca e radhës e dosjes ‘Plumbi i artë’ në Gjykatën e Posaçme Antikorrupsion dhe kundër Krimit të Organizuar.
Në gjyqin e bujshëm vijon dëshmia dhe ballafaqimi i të penduarit të drejtësisë, Nuredin Dumani me të pandehurit e çështjes dhe avokatët mbrojtës të tyre, ku iu përgjigj pyetjeve mbi rrethanat e ngjarjeve të ndryshme.
Dumani ka dëshmuar se si ka drejtuar një skuadër vrasësish me pagesë në mbi një dekadë, 12 vrasje të kryera, atentate të ndryshme me armë dhe bomba, grabitje dhe krime të tjera, për llogari të organizatave të fuqishme kriminale, të paktën 8 të tilla, në trekëndëshin Tiranë-Durrës-Elbasan kryesisht dhe të tjera.
Gazetarja e Report Tv, Keti Banushi, informon se ditën e sotme (18 mars), seanca ka vijuar me pyetjet nga avokati i Fatos Gosës, Përparim Kulluri, i cili i kërkoi Dumanit të tregonte se si u arrestua herën e fundit nga policia dhe pse nuk e vrau ‘Otin’ e Elbasanit, Elton Kila.
“Sepse Oti nuk ishte në Elbasan. Më ka nxjerrë në pritë Sueli. Oti (Elton Kila) nuk ishte as në Elbasan, as në Shqipëri. Henrik Hoxha ishte me një ‘E Class’ të marrë me qira në Fier (Suel Çela sipas hetimeve i kishte kërkuar Dumanit të vriste Kilën për 200 mijë euro). Henrik Hoxha komunikonte shpesh me Suel Çelën me ‘Matrix’ dhe me një program tjetër. Unë me Suel Çelën kam folur vetëm në momentin e atentatit, do dalin të gjitha në ‘Matrix’. Nuk më ka bërë njeri presion për të bërë marrëveshjen me prokurorinë. Unë kam treguar, prokuroria nuk më ka premtuar gjë. Nuk kam çfarë marrë në këmbim. Me Talo Çelën jam njohur në fund 2009-2010, përmes Ilirjan Feçit. Me Talon i prisha marrëdhëniet sepse ai do vriste vëllanë tim. Agim Kabashin e kam pas komshi. Fatos Gosën e kam takuar dy herë. E kam parë disa herë. Talo Çela më ka thënë që komunikonte me Fatos Gosën me telefon të kriptuar. Me Talo Çelën takimin e fundit e kemi bërë te shtëpia ime, në 2019, ose fillim i 2020. Kam folur me të në telefon, kjo është në Sky Ecc. Ka qenë vera e 2020. Që prej atherë nuk kam më komunikim. Ai me kërkoi të vrisja Erjon Alibej për 2 milionë euro. E kam takuar Fatos Gosën te “Pishat” në Peqin. Zonën nga Rrogozhina në Elbasan e njoh shumë mirë. Unë kam qenë me makinë të vogël, 2-3 minuta ndenja. Ika për Durrës pastaj. Fatosin e njihja edhe më përpara. Pas daljes time nga burgu u takuam për herë të parë”, dëshmoi Dumani duke iu përgjigjur pyetjeve.
Seancat e kaluara ai ka treguar edhe për 3 kodet që përdorte në telefonat e kriptuar, duke njoftuar edhe se kishte të paktën 3 platforma sekrete komunikimi; Sky Ecc, Matrix dhe BQ, për të cilat u kishte dhënë edhe fjalëkalimet prokurorëve të SPAK-ut.
