Ministrja e Shëndetësisë dhe e Mbrojtjes Sociale, Ogerta Manastirliu së bashku me ekspertët e shëndetit publik prezantuan ditën e sotme për mediat strategjinë e testimit si dhe gjurmimin e rasteve.
Manastirliu u shpreh se duke filluar nga muaji shtator do të zgjerohen akoma më shumë kapacitetet. Ministrja e Shëndetësisë parashtroi fuqizimin e disa elementëve të rritjes së survejancës. Testimit, gjurmimit dhe kapaciteteve laboratorike.
Gjatë prezantimit të masave për vjeshtë dimër, Manastirliu tha se qeveria shqiptare ka vendosur të rrisë financimin për të kryer vaksinimin falas të gjithë grupeve të rrezikuara.
“Po bëjmë cdo përpjekje që kemi në dorë, për tju përgjigjur situatës së pritshme në vjeshtë dimër. Struktura jonë kombëtare e testimit duhet të sigurojë që të përballohen kërkesat për testim dhe diagnostikim për qytetarët e dyshuar të prekur nga COVID19. Në kuadër të zgjerimit të mëtejshëm të mbulimit me teste, po punohet që nga Shtatori të realizohet dyfishimi i testimeve.
Nga muaji Shtator do të zgjerohen kapacitetet, me pajisje të reja për ekstraktim automatik, sistem të automatizuar për testimin e terrenit, pajisje ftohëse për ruajtjen e mostrave, sistem i integruar për menaxhimin e informacionit në laborator. Jo vetëm do të rrisim kapacitetet në disa laboratorë publikë në vend, por edhe do të rrjetin e laboratorëve COVID-19 në bashkëpunim me sektorin publik dhe privat.
Pjesë e strategjisë së vjeshtë-dimrit është edhe shumëfishimi i vaksinave falas kundër gripit, për të mbuluar të gjithë grupet e riskuara, të përcaktuara nga ekspertët e ISHP, që nga personeli shëndetësor, tek të moshuarit, edukatorët, arsimtarët, fëmijët 2-5 vjeç, etj, me vaksinën e gripit falas”, u shpreh Manastirliu.
