Ish-Prokurori i Përgjithshëm dhe drejtori i Magjistraturës Arben Rakipi deklaron se drejtësia e ka vetë në dorë drejtësinë e re të dalë nga reforma. I ftuar në emisionin HARD TALK NGA ROLAND QAFOKU, ai deklaroi:
-A mendoni ju se politika do e lërë të qetë drejtësinë?
-Sjellja e politikës ndaj drejtësisë është e njëjtë. Dikush mund ta bëjë në mënyrë elegante, dikush e bën në mënyrë të dhunshme.
Ajo që më pyet, varet nga drejtësia. U bë vite e vite që sistemi i drejtësisë në Shqipëri pavarësisht influencave të forta që ka pasur dhe mungesës së kushteve për tu vetë-zhvilluar sistemi i drejtësisë ka qenë një sistem shumë larg për ta konsideruar pushtet të pavarur. Pushteti i pavarur ka qenë një deklarim kushtetues jo thelbësor.
Sistemi i drejtësisë në Shqipëri asnjëherë nuk është mbledhur për të qarë realisht hallet e vërteta të sistemit. Nëse do vazhdojë të jetë kjo gjendje, fati i drejtësisë do varet nga ky moment.
Drejtësia jo vetëm në Shqipëri, por në gjithë botën, është sistem elitar. Ndikimi që ka për shkak të ligjit duhet të jetë një ndikim i gjithë trupës karshi ambientit, qoftë edhe politik. Nëse nuk reagon, nuk bën gjë, nëse imponohet të heshtë, atëherë fati i drejtësisë do jetë ai që kemi shijuar deri tani. /Fjala.al/Ke.Ba
