Kryeministri Edi Rama ka pohuar se do të jetë mes personave të parë që do të vaksinohet në Shqipëri për Covid 19, por ai ka zbuluar se e para që do ta nisë këtë proces do të jetë mjekja e njohur e Infektivit Najada Çomo.
“Duke parë se janë disa personaK, mes tyre edhe unë dhe që kam respekt për gratë, e para do të jetë doktoresha Najada Çomo. Më pas mund të jem unë, ose dhe mjeku me përvojë Tritan Kalo“, – u shpreh Rama.
Rama ka deklaruar se fushata e vaksinimit do të nisë me 975 dozat e para që janë marrë nga një vend mik i BE-së, i cili sipas tij pritet që të dhurojë dhe 2 mijë doza të tjera në ditët në vijim.
Rama ndër të tjera ka theksuar se vaksina nuk është e detyrueshme dhe asnjë nuk do të ketë asnjë penalizim për ata që nuk do e bëjnë.
Ai ka theksuar se nga fillimi i javës tjetër, pritet që të merren dhe mbi 10 mijë vaksinat e para të Covid, ku një pjesë të dozave do i dërgohet Kosovës për mjekët e spitalit Infektiv.
Ndër të tjera, ministrja e Shëndetësisë Ogerta Manastirliu është shprehur se procesi në Shqipëri do të nisë me rreth 1 mijë punonjës të bluzave të bardha që do të vaksinohen.
Pas kësaj kategorie, do të vaksinohen të moshuarit mbi 75 vjeç dhe personat me sëmundje kronike. Vaksinimi do të nisë sot në orën 15:00 në ambientet e ish-stadiumit kombëtar “Qemal Stafa” tashmë të rikonstruktuar.
