Nga Fernada Cenko
Ngjarje e paprecedentë ka ndodhur ditën e djeshme ku i përfshirë ka qenë Presidenti i Shqipërisë Ilir Meta. Pas vendimit të Bashkisë Tiranë për të liruar zyrat partia opozitare Fryma e re Demokratike, në këtë seli është shfaqur Presidenti Meta duke u përplasur trup me trup dhe duke ju kërkuar të dalin jashtë policët e bashkisë. Ngjarja ka qenë disi e agravuar kur ka hyrë presidenti në lojë. Metës duket se i ka dalë situata jashtë kontrollit. Mes ulërimave, kreu i Shtetit ju ka kërkuar punonjësve që të dalin jashtë dyerve të selisë. Nuk ka ndodhur në historinë e Presidentëve në Republikën e Shqipërisë, që Presidenti të jetë mes personave të cilët ndeshen fizikisht. Kreu i Shtetit ju është drejtuar policëve bashkiakë dhe punonjësve të tjerë se do t’i dërgojë në burg me duart e tij. Pasi u larguan punonjësit bashkisë, Meta ka mbajtur një deklaratë për median duke e quajtur nxjerrjen “jashtë” të selisë së FRD si përpjekje për grusht shteti. Meta ka përdorur tone të forta kundrejt kryetarit të Bashkisë Tiranë Erion Veliaj dhe kryeministrit Edi Rama. Para mediave, ai tha se shkresa e dërguar nga bashkia për lirimin e zyrave nuk ka as vulë, as emër titullari, as numër protokolli dhe është bërë për të dhunuar çdo forcë opozitare. Meta e cilësoi bashkinë bandë dhe i bëri thirrje opozitës të zgjohet dhe të mos lejojë asnjë prekje të rregullave të garës sepse do të jetë vonë. “E konsideroj si një përpjekje për të realizuar një grusht shteti sepse t’i sjellësh një partie zyrtare, opozitare menjëherë pasi nënshkruan një marrëveshje me PD dhe partitë e opozitës, për të marrë pjesë në zgjedhje, një shkresë të tillë që nuk ka as vulë, që nuk ka as emër titullari që të mbajë nesër përgjegjësi, që nuk ka as numër protokolli, të bërë me vrap e nxitim vetëm për të dhunuar fizikisht, por edhe psikologjikisht çdo forcë opozitare e cila synon të konkurrojë në kushte të barabarta në zgjedhje, duke keqpërdorur bashkinë bandë, padyshim që është tepër irrituese dhe është një paralajmërim për qytetarët shqiptarë për përpjekjet mafioze për të vënë dorë mbi votën e barabartë, mbi procesin zgjedhor me garanci dhe integritet”, tha Meta. Ai i ka bërë thirrje gjithë opozitës që të zgjohet dhe të mos lejojë asnjë prekje të rregullave të garës sepse, sipas tij, do të jetë vonë për popullin shqiptar në rast se do vijojë të tolerojë sjelljet e partisë bandë. Presidenti i vendit sqaroi më tej se çfarë kishte ndodhur deri në përplasjen me policinë teksa paralajmëroi efektivët bashkiakë dhe ata të policisë së Shtetit të zbatojnë ligjet. Nuk mungoi dhe një paralajmërim për kreun e Bashkisë së Tiranës Erion Veliaj. “Jam këtu pas bisedës telefonike të bërë nga kryetari i FRD-së zoti Shehu për këtë situatë, po kaloja këtu rastësisht dhe ju e patë si dhunohet nga njerëz pa asnjë autorizimi, kryetari i FRD-së së Tiranës në kushtet kur këtu vjen Presidenti i Republikës. Po i paralajmëroj dhe njëherë të gjithë policët, bashkiakë dhe të Policisë së Shtetit, zbatoni ligjet! Të mos përfundoni si policët e Mubarakut, nën këpucët e popullit shqiptar. Kaq! Dhe po i them kryepalaços së bashkisë bandë, ti e di shumë mirë se çfarë kë bërë pa firma dhe me firma. Prandaj mos iu bind më urdhrave të të çmendurit sepse ai do nxjerrë kartelën e të sëmurit psikik më 25 prill apo ndoshta dhe më përpara”, tha Meta.
