Fermerët që mbajnë lopë do të përfitojnë nga qeveria një subvencion prej 10 mijë lekësh. Për të përfituar mbështetjen e qeverisë fermeri duhet të këtë të paktën 5 krerë dhe të marrë 10 mijë lekë për çdo kokë. Vendimi është marrë në mbledhjen e Këshillit të Ministrave ku janë përcaktuar kriteret për përfituar subvencion dhe fondi që është vënë në dispozicion të Ministrisë së Bujqësisë. Fondi i miratuar në buxhetin e vitit 2020 për Ministrinë e Bujqësisë dhe Zhvillimit Rural, zëri “Transfertë në buxhetet familjare”, do të përdoret për:
a) rritjen e konkurrueshmërisë së prodhimeve blegtorale, të prodhimeve bujqësore në mjedise të mbrojtura dhe uljen e kostove të prodhimit, nëpërmjet pagesave të kafshëve të matrikulluara e subvencionimit të çmimit të plastmasës;
b) shtimin e sipërfaqeve të mbjella me bimë mjekësore dhe aromatike;
c) certifikimin e produkteve bujqësore dhe fermave organike;
ç) mbështetjen e diversifikimit të aktiviteteve ekonomike në zonat rurale.
Në vendim është përcaktuar masat e mbështetjes dhe masa e financimit nga fondi i programit për bujqësinë dhe zhvillimin rural janë, si më poshtë vijon:
a) Për tufën bazë të matrikulluar, për fermat me jo më pak se 70 krerë dele dhe/ose dhi, në vlerën 1 200 lekë/krerë, por jo më shumë se 360 000 lekë për subjekt, ndërsa për fermat me jo më pak se 5 krerë lopë, në vlerën 10 000 lekë/krerë, por jo më shumë se 500 000 lekë për subjekt;
b) Mbarështim i bletarisë me 1 000 lekë për zgjua, për ferma me jo më pak se 50 zgjoje, por jo më shumë se 150 000 lekë për subjekt;
c) Zëvendësimi i plastmasës termike për serrat diellore ekzistuese për prodhimin e perimeve, rrushit për tavolinë dhe tunelet plastike për prodhimin e luleshtrydhes në vlerën respektive 300 000 lekë/ha dhe 100 000 lekë/ha, por jo më shumë se 500 000 lekë për subjekt.
