Vetëvarja e një 13-vjeçari në Lushnjë ishte një rast tragjik dhe ççështja bëhet edhe më e rëndë kur dyshimet bien se e gjitha kjo u shkaktua pas një loje në rrjetin social Tik-Tok. Ministrja e Arsimit, Evis Kushi ka reaguar sërish për rastin e rëndë nga Elbasani, duke thënë se ky është një shqetësim që ajo e ka ngritur prej kohësh dhe se duhet një debat i gjerë ku të përfshihen të gjitha grupet e interesit, institucionet, mësuesit dhe prindërit.
Ajo kërkoi nga prindërit që të tregohen më të vëmendshëm dhe të kontrollojnë informacionet që fëmijët marrin në internet.
“Është shqetësim që e kam ngritur prej kohësh edhe në media, edhe në të gjitha takimet qe zhvilloj me mësues e prindër. Fëmijët rrinë për kohë të gjatë dhe aksesojnë në burime në të pasigurta informacioni që influencon sjelljen e tyre. Rasti i 13-vjeçarit në Lushnjë ende nuk janë vërtetuar se cilat janë shkaqet, por dyshimet janë përdorimi i rrjeteve sociale. Është përgjegjësi e shoqërisë, ne padyshim si institucion kemi përgjegjësi por kjo është detyrë që duhet ta bëjmë të gjithë jo vetëm institucionet, por padyshim edhe familja. Jemi dëshmitar i rasteve që prindërit nuk i kontrollojnë fëmijët për informacionet që marrin në internet. Të hapim një debat të gjerë për këtë teme”, tha Kushi.
13-vjeçari Arjet Sulovari humbi jetën pasi ishte vetëvarur me spango në qafë në dhomën e tij në Golem të Lushnjës. Ai u gjet i pajetë nga prindërit, ku edhe pse u dërguar në spital, për të ishte shumë vonë. Ndërsa policia vijon hetimet për zbardhjen e arsyeve që mund të kenë çuar të miturin të varë veten, mes dyshimeve janë edhe fakti se ai mund të ishte duke bërë një video në rrjetin social Tik-Tok dhe fatkeqësisht argëtimi mund të jetë kthyer në tragjedi. Këto janë ende dyshime dhe nuk janë vërtetuar nga policia, por miqtë e 13-vjeçari shprehen jashtë kamerës se i mituri frekuentonte rrjetet sociale dhe i pëlqente Tik-Tok.
