Kryeministri Edi Rama ka dhënë sot një lajm të mirë për të gjithë ata që presin njohjen e patentave të drejtimit të makinave të tyre në Gjermani. Përmes një postimi në faqen e tij në Facebook, Rama ka bërë me dije se në Konferencën e Sigurisë në Mynih, ka biseduar me Ministrin Federal të Transporteve të Gjermanisë, i cili është shprehur se “misioni ynë teknik në Tiranë është befasuar nga transformimet që keni kryer në Drejtorinë e Transportit Rrugor, përmes digjitalizimit të shërbimeve! Zgjidhjet e reja digjitale që keni realizuar janë origjinale dhe bindëse për t’i përcjellë Qeverisë Federale një opinion pozitiv”.
“Aprovimi i shumëpritur i njohjes së patentave shqiptare të drejtimit, kalon përmes të 16 parlamenteve të landeve të Republikës Federale të Gjermanisë dhe kjo do të kërkojë pak kohë, por ndërkohë çdo aprovim bën që në landin përkatës njohja të hyjë në fuqi menjëherë.
Pak durim tanimë, se provimin e kemi kaluar me sukses dhe ky është një fakt që na inkurajon shumë për vazhdimin e #RevolucionitDigjital2020”, shkruan Rama, duke i rezervuar një bravo të madhe ekipit drejtues të DPSHTRR që, sipas tij, po e transformon çdo ditë atë strukturë nga një vatër korrupsioni legjendar, në një mekanizëm shtetëror në shërbim të qytetarëve.