Përhapja e koronavirusit në shtetet evropiane ka alarmuar çdo person dhe ka bërë që të shtyhen një pjesë e aktiviteteve sportive si dhe vuri në diskutim zhvillimin e Lojërave Olimpike.
Megjithatë Drejtori i Përgjithshëm, i komitetit organizator, Toshiro Muto, ka bërë një njoftim zyrtar ku bën me dije se lojërat do të vazhdojnë, megjithatë ka theksuar se përmasat e aktivitetit në fjalë do të jenë të zvogëluara.
“Frika nga koronavirusi nuk do të pengojë ngritjen e pishtarit të Lojërave Olimpike, por do të zvogëlojë përmasat e evenimentit.
Nuk ka plane për të anuluar ngritjen e flakës Olimpike, pishtari ikonik i së cilës do të përshkojë gjithë Japoninë për të arritur më pas në destinacionin përfundimtar të saj, që është Tokio ku dhe do të zhvillohen Lojërat 2020”.-ka thënë Toshiro Muto.
Stafeta për mbajtjen e pishtarit do të fillojë më 26 Mars siç edhe ishte planifikuar, ndërsa janë duke u marrë masat për zhvillimin e evenimentit pa rritur rrezikun e infektimit të pjesëmarrësve me koronavirus.
Muzeu Olimpik i Japonisë, që është ndërtuar pranë Stadiumit Olimpik në Tokio, do qëndrojë i mbyllur deri më 16 mars në pritje të udhëzimeve të reja nga qeveria për të parandaluar përhapjen e virusit./Fjala.al/
