Presidenti Ilir Meta duke përkujtuar mëngjesin e sotëm, Besëlidhjen e Lezhës të mbajtur nga Skënderbeu më 2 marsin e vitit 1444, ka hequr një paralele mes kësaj date dhe protestës së ditës së sotme.
Meta shkruan se ai po ndjek shembullin e heroit kombëtar që sipas kreut të shtetit ‘na ka lënë si si testament, domosdoshmërinë e bashkimit në momentet më të rrezikshme të ekzistencës së kombit tonë’.
Për këtë arsye, Ilir Meta shkruan më tej në Facebook-un e tij, se me protestën e sotme do të krijohet Besëlidhja e re e shqiptarëve.
“Heroi ynë kombëtar Gjergj Kastrioti Skënderbeu, siç me të drejtë ka thënë Fan Noli, do të mbetet shqiptari më i gjallë ndër të gjallët, figura më shpëtimtare dhe më frymëzuese për mbijetesë e kombit tonë, që testament na ka lënë domosdoshmërinë e bashkimit në momentet më të rrezikshme të ekzistencës së kombit tonë.
Sot në përkujtim të ngjarjes historike të Besëlidhjes së Lezhës, unifikimit kombëtar përballë rrezikut të asimilimit e shkombëtarizimit, mesazhi që na sjell nga historia, uroj të na ndihmojë ne të gjithëve për reflektuar, për t’u ngritur dhe bashkuar sa nuk është vonë, në një Besëlidhje të re, po aq të fortë e gjithëpërfshirëse, përballë një rreziku të ri pushtimi nga një sekt mafioz, pa fe, pa familje, pa atdhe, që ka marrë peng të ardhmen e çdo shqiptari!
Zëri i popullit është zëri i Zotit! Erdhi koha të dëgjohet sa më fort!
Mirë se vjen BESËLIDHJA E RE me Pranverën Kuqezi! ??”,shkruan Meta në Facebook.
