Ndonëse u duk si e paprekur nga virusi i rrezikshëm që është përhapur në një numër të madh vendesh të botës, por sidomos në Europë, Premier League-a ka vendosur sot që të pezullojë kampionatin deri në datë 4 prill.
Ky vendim i kampionatit më të madh të futbollit në Angli erdhi pasi nga mbrëmja e djeshme e deri më tani janë shtuar shumë rastet e personave të botës së këtij sporti që kanë rezultuar pozitiv ndaj koronavirusit.
Në orët e fundit në Angli raportohen të kenë rezultuar pozitiv ndaj Covid-19 trajneri i skuadrës së Arsenalit, Mikel Arteta, sulmuesi i Chelseas, Callum Hudson-Odoi, portieri i Bournemouth, Artur Boruc dhe një lojtar i Everton, emrin e të cilit klubi në fjalë nuk ka dashur që ta bëjë publik.
Konfirmimi i këtyre rasteve ka çuar në izolimin e këtyre katër klubeve ku përfshihen lojtarët dhe i gjithë stafi, duke e bërë të pamundur vijimësinë e ndeshjeve të planifikuara në kalendarin e Premier League.
Vendimi për pezullimin e kampionatit të Premier League ka ardhur pas mbylljes së garave të futbollit në Itali vendi me më shumë viktima dhe të prekur në Europë, Spanjë dhe Francë.
Ky lajm u bë publik mëngjesin e sotëm nga një komunikim me mediat e Ligës angleze që njoftoi se kjo masë është e nevojshme momentalisht, duke parë situatën në të cilën ndodhet futbolli.
Ndërkohë duhet theksuar se paraditen e sotme qeveria evropiane e futbollit, UEFA vendosi që të shtynte me një javë ndeshjet e të gjitha garave përfshirë këtu Champions e Europa League dhe kjo për shkak se shumë aktorë të botës së futbollit janë të prekur nga virusi i rëndë./Fjala.al/
