Pas tërmetit shkatërrimtar të 26 nëntorit, Shqipëria në dy ditët e fundit është gjendur pushtetin e ujit. Reshjet e shumta të shiut të nisura që nga pasditja e të shtunës kanë shkaktuar përmbytje në disa qytete të vendit.
Shirat rrezikuan edhe jetën e 150 pasagjerëve të cilët arritën të nxirren nga trageti në bregdetin e Vlorës, pas 14 orësh qëndrimi në det.
Kjo solli edhe paralizimin e punës në portin e Vlorës, ku udhëtimet që ishin parashikuar të bëheshin një ditë më parë u anuluan duke sjellë edhe kaos në portin e Brindisit.
Në Durrës, Vlorë dhe Shëngjin është pezulluar lundrimi për mjetet e peshkimit. Ndërsa në Sarandë edhe për anijet e pasagjerëve që nisen drejt Korfuzit.
Linjat e tjera të tragetit kanë vijuar punën normalisht.
Zonat e përmbytura
Reshjet e shumta të shiut bëri që të dalë nga shtrati edhe lumi Ishëm në Fushë- Krujë. Për pasojë janë përmbytur dhjetëra hektarë tokë bujqësore. Reshjet e dendura të shiut kanë nxjerrë nga shtrati edhe përroin e Zaranikës në qytetin e Elbasanit, ku banesat pranë përroit kanë qenë në rrezik përmbytjeje.
Gjithashtu edhe Qarku i Lezhës është përfshirë nga reshje të dendura shiu, megjithatë nuk ka krijuar probleme në përmbytje. Megjithatë, është ndaluar dalja e mjeteve lundruese nga porti i Shëngjinit.
Në Rajonin Jugor ka pasur rënie të mëdha gurësh dhe inertesh në akset Ura e Leklit – Këlcyrë dhe Berat – Çorovodë, si dhe në vendin e quajtur Shkalla e Zezë në aksin Gjitokastër – Tepelenë. Ndërsa në akset Tepelenë-Dukaj dhe Këlcyrë – Përmet ka pasur rënie pemësh. Është punuar nga kontraktorët për pastrimin e tyre të menjëhershëm dhe aktualisht të gjithë akset janë me kalueshmëri normale.
Familjet e prekura nga tërmeti gjenden nën ujë
Shumë familje të cilat u prekën nga tërmeti i 26 nëntorit dhe që janë strehuar në çadra janë gjendur nën pushtetin e ujit.
Katër anëtarët e familjes Vathi në fshatin Murqinë të Krujës, pas shembjes së shtëpisë nga tërmeti janë strehuar në këtë çadër, ku balta dhe reshjet e shiut e bëjnë jetesën më të vështirë.
Tërmeti i 26 nëntorit ka dëmtuar rreth 10 banesa në fshatin Murqinë të Krujës, zonë e cila vuan shpesh edhe pasojat e përmbytjes. Sipas banorëve grupet e verifikimit kanë evidentuar dëmet e shkaktuara nga tërmeti, por deri më tani asnjë ndihmë nuk u është ofruar.
Ato refuzojnë të largohen nga çadrat për t’u strehuar në hotele, pasi nuk pranojnë të lënë pas bagëtitë, të cilat i konsiderojnë të vetmin burim të ardhurash.
Nuk luhet as futboll
Nga reshjet e shiu këtë fundjavë nuk është luajtur as futboll. Shiu ndërpreu ndeshjet Flamurtari-Teuta për të rifilluar pas pushimit të tij.
Gjithashtu edhe Tirana- Laçi u luajt në një terren mjaft të rënduar.
Reshjet e shiut kanë vijuar edhe përgjatë mëngjesit të sotëm. Megjithatë, reshjet kanë zgjatur shumë pak duke bërë që situata të shkojë drejt normalizimit./Fjala.al/
