Edhe pse nuk ka shumë dallim mes koronavirusit dhe gripit të zakonshëm, ekziston një shenjë, një simptomë e cila duhet konsideruar seriozisht.
Mjeku infeksionist Pëllumb Pipero, tha se temperatura, kolla apo këputja fizike, janë shenja që korrespondojnë edhe me gripin e zakonshëm, por nëse këtyre u bashkëngjitet edhe vështirësia në frymëmarrje, atëherë duhet konsideruar.
“Duhet të kemi parasysh, që kolla, temperatura dhe këputja fizike janë simptoma edhe të gripit të zakonshëm, por vështuirësia në frymëmarrje është pothuajse ajo shenjë që e bën më të mundshëm praninë e koronavirusit te një person“, tha Pipero në “News24”,
Mjeku infeksionist, i pyetur edhe në lidhje me masat që po ndërmerren në pikat kufitare, tha se ato janë në përputhje me kërkesat e OBSH-së, por sigurisht që vetëm matja e temperaturës nuk është efikase, pasi temperaturë mbi 38 mund të ketë kushdo, edhe një person që nuk është me koronavirus.
Sipas Pipero, tha se mundësinë janë të mëdha që Shqipëria të ketë raste te infektuar me koronavirus. Ai deklaroi se shëndetësia ka të gjitha kapacitetet për të trajtuar rastet e para të prekur me këtë virus vdekjeprurës, ndërsa shtoi se ka dhe një laborator me standarde bashkëkohore, që mund të nxjerrin analizat brenda ditës.
“Mundësitë janë të mëdha që ta kemi një rast. Janë marrë të gjitha masat, që një rast, që vjen si i dyshuar, pra ka shenjat e gripit dhe kthehet nga një zonë ku koronavirusi është i lartë, përballet me personel të veshur tërësisht, futet në dhomën e veçantë, që është e izoluar, me aspirator. Unë jam kundër karantinës së ekzagjeruar, unë mund të bëj karantinë për një person që vjen nga Italia ose Kina, i vë termometrin në Rinas dhe është me temperaturë, dhe e mbaj disa orë, derisa të vërtetoj nëse ka apo jo koronavirus. Vështirësia në frymëmarrje është shenjë e rëndësishme klinike, që tregon koronavirusin.
Asnjë vend në botë, sado i sofistikuar e i pasur të jetë, nuk i ka kapacitet për të përballuar një virus. Rasti i Kinës e tregoi këtë. Pra, momenti i parë është shumë i vështirë, se nuk dihet sa të prekur do ketë. Unë them që kemi të gjitha kapacitetet të mirëadministrojmë rastet e para. Kemi një laborator të standardeve bashkëkohore, që në disa orë vë diagnozën. Jap mesazhe realiste, jo qetësuese, pra i kemi të gjitha kapacitetet të përballemi për fazën e parë, më tej kapacitetet do të krijohen në bazë të situatës”, tha Pipero.
