Duke mos përmendur në asnjë moment termin “Republikë e Kosovës”, Kyriakos Mitsotakis, kryeministër i Greqisë, i ka dërguar një telegram urimi Albin Kurtit për zgjedhjen si kryeministër.
Në letër, Mitsotakis thekson se Greqia “ka qenë avokat i vazhdueshëm i perspektives Evropiane për Ballkanin Perëndimor”, ndërsa garanton se vendi i tij “do të vazhdojë të mbështesë në mënyrë aktive aspiratat e popullit të Kosovës”.
Por në mesazhin e Mitsotakis ka edhe një kritikë për Prishtinës që mesa duket lidhet me taksën 100% që është vendosur për produktet serbe dhe për të cilën Athina ka bërë më parë thirrje që të hiqet.
“Vazhdimi i dialogut ndërmjet Prishtinës dhe Beogradit, të lehtësuar nga ana e BE-së, si dhe shmangia e veprimeve që janë në kundërshtim me marrëdhëniet e mira fqinjësore, do të fuqizonte perspektiven tuaj Evropiane”, thuhet në letrën e Mitsotakis për Kurtin.
Letra e plotë
I nderuar z. Kurti,
Dëshiroj të ju përgëzoj për zgjedhjen tuaj si Kryeministër, dhe ju uroj çdo sukses!
Siç e dini, Greqia gjithmonë ka qenë avokat i vazhdueshëm i perspektives Evropiane për Ballkanin Perëndimor, me qëllim të promovimit të stabilitetit dhe prosperitetit në rajonin tonë të përbashkët, Evropën Jug-Lindore.
Jam i bindur se zbatimi i reformave të nevojshme nga ana e Prishtinës, në përputhje me rekomandimet e BE-së, vazhdimi i dialogut ndërmjet Prishtinës dhe Beogradit, të lehtësuar nga ana e BE-së, si dhe shmangia e veprimeve që janë në kundërshtim me marrëdhëniet e mira fqinjësore, do të fuqizonte perspektiven tuaj Evropiane. Në këtë drejtim, Greqia do të vazhdojë të mbështesë në mënyrë aktive aspiratat e popullit të Kosovës.
