Është regjistruar personi i tretë i prekur nga koronavirusi në Kosovë, ndërsa mësohet të jetë një 39-vjeçar nga Vitia.
Ky lajm u konfirmua nga Ministri i Shëndetësisë së Kosovës, Arben Vitia, i cili thekson se rasti i tretë është i afërm i të parit, raporton Telegrafi.
“Kemi një rast pozitiv, bëhet fjalë për një të afërm të pacientit nga Stublla e Vitisë, që u diagnostifikua dje me koronavirus. Të dashur qytetarë, ju lutem që të zbatoni me përpikëri të gjitha rekomandimet që dalin nga institucionet tona për të mbrojtur shëndetin tuaj”,-deklaroi ministri para mediave.
Dy pacientët e konfirmuar të premten (dje), janë një 77 vjeç dhe një 20 vjeçe, ndërsa i treti është 39 vjeç.
Naser Ramadani, nga Instituti Kombëtar i Shëndetësisë Publike, ka bërë me dije për mediat se gjendja e tyre është e qëndrueshme.
Rikujtojmë se ditën e djeshme u konfirmuan rastet e para me koronavirus në Kosovë, që rezultuan të ishin një 77 vjeçar nga Vitia dhe një 20 vjeçare shtetase e Italisë, por që ishte me qëndrim në Klinë. Pas konfirmimit të këtyre dy rasteve, komuna e Klinës dhe Vitisë u futën në karantinë.
Qeveria e Kosovës ka marrë disa masa në mënyrë që të parandalohet përhapja e koronavirusit, duke vendosur të mbyllë të gjithë kufijtë, lokalet e qendrat tregtare./Fjala.al/
