Një nënë e prekur nga koronavirusi iu ka bërë thirrje qytetarëve të qëndrojnë në shtëpi dhe të mos bëhen egoistë për të dalë në rrugë.
Britanikja Maecela Diaz Young, me anë të një videoje iu është lutur të gjithëve që të minimizojnë përhapjen e epidemisë.
“Dua t’u them të gjithëve, ju lutem qëndroni në shtëpi. Ju lutem, ju lutem, respektoni karantinën. Kjo është shumë serioze. Njerëzit me sëmundje kronike mund të vdesin. Ju lutem mos u tregoni egoistë. Mendoni për njerëzit në rrezik”, u është lutur nëna britanike. Ndërsa tregon momentin e shfaqjes së simptomave të COVID-19.
“Kam pasur një javë me të vërtetë të keqe. Unë ende po përpiqem të marr frymë. Të gjithë më thonë: Nuk do të vdesësh Marcela. Unë nuk do të vdes, e di këtë, por ne po infektojmë njerëz dhe ata mund të rrezikojnë të humbin jetën.”
Britanikja Maecela Diaz Young shtoi se: “Java që lamë pas ishte një javë që dua ta harroj. Është gjëja më e tmerrshme që mund të ndodh me ju nëse jeni mbartës të koronavirusit. Ju nuk mund të merrni frymë si normalisht. Unë jam e frikësuar, por trupi im po e lufton këtë të keqe. Mendova se virusi nuk do të më prekte mua. Mendova se do të ishte një grip zakonshëm sezonal. Por jo, ky nuk është një grip i zakonshëm”.
