Kryeministri Avdullah Hoti së bashku me homologun e tij Edi Rama kanë zhvilluar një takim, ku nuk munguan falënderimet për mbështetjen që Shqipëria i ka dhënë Kosovës.
Hoti tha se Qeveria e Kosovës e konsideron natyrshëm Shqipërinë si partnerin më të afërt dhe strategjik në procesin e realizimit të synimeve integruese euroatlantike.
Hoti kujtoi edhe njëherë se Kosova tashmë ka një kulturë të dëshmuar institucionale për t’i përballuar me dinjitet sfidat e tilla që nuk janë të lehta. Pavarësisht rrethanave dhe vështirësive që mund të dalin gjatë procesit, Qeveria e Kosovës është e përkushtuar që ta zhvillojë agjendën e saj të integrimeve euroatlantike, tha Hoti.
“Ne jemi të vendosur ta vazhdojmë procesin e dialogut me Serbinë, me qëllim të arrijmë një marrëveshje të përhershme paqeje e stabiliteti, e cila do të rezultojë me njohjen e ndërsjellë në mes dy vendeve”
Ndërkohë, numri një i qeverisë, gjatë këtij takimi ofroi mbështetjen e plotë të qeverisë shqiptare për institucionet dhe popullin e Kosovës.
“Shqipëria i ka qëndruar dhe do t’i qëndrojë gjithmonë pranë Kosovës, edhe në të ardhmen, Shqipëria do ta ndihmojë Kosovën në të gjitha proceset”
Rama në përfundim të takimit e ftoi kryeministrin Hoti për një vizitë zyrtare në Shqipëri, e cila pritet të realizohet këtë të premte, më 3 korrik 2020.
la.mi/fjala.al
