Presidenti i Federatës Polake vlerëson ecurinë e kuqezinjve në 5 vitet e fundit. Ashtu sikundër trajneri i përfaqësueses, Jerzi Brzeçek, edhe Presidenti i Federatës Polake të Futbollit, Zgibniev Boniek, është shprehur i kënaqur me shortin e Eliminatoreve të Botërorit “Katar 2022”. Ky short e vuri skuadrën e ish-lojtarit të njohur të Polonisë në grupin I, përballë Anglisë, Hungarisë, Shqipërisë, Andorrës dhe San Marinos.
Dhe duke folur në një emision televiziv polak, Bonieku është shprehur fillimisht për përbërjen e grupit. “Është një grup përgjithësisht i kënaqshëm dhe nuk kemi arsye pse të qajmë e të vajtojmë, – ka deklaruar ai, duke vijuar: “Për mua, Anglia është favorite kryesore për biletën që të çon drejtpërdrejt në Botëror, çka nënkupton se ne duhet të kënaqemi realisht me vendin e dytë, që të çon në “play-off”.”
“Çdo renditje më poshtë do të ishte katastrofave, – ka vijuar polaku. – Megjithatë, unë besoj tek të papriturat dhe këtë shpresoj ndaj Anglisë.” Ndërkaq, kreu i organizimit që qeveris futbollin polak e ka vlerësuar lart Kombëtaren kuqezi. “Sa i përket Shqipërisë, ky është viti i 5-të që po na emocionojnë me debutimin e tyre shumë të mirë”, – ka deklaruar Bonieku.
“Pas debutimit të tyre në Evropianin “Francë 2016”, ata duken një skuadër optimiste, që beson më tepër tek vetvetja, – ka vijuar ai. – Megjithatë, kjo nuk do të thotë që duhet të shqetësohemi shumë, edhe ata kanë patur problemet e tyre në ndeshjet në grupe. Është e vërtetë që shumë prej lojtarëve të saj luajnë në Evropë, por e njëjta gjë vlen edhe për ne.”
Legjenda e futbollit polak përmendi edhe marrëdhënien e ngrohtë që ai ka me homologun e tij, presidentin e Federatës Shqiptare, Armand Duka, të cilin e vlerësoi për punën që ka bërë në këto vite.
Pa.Va/Fjala.al