Asnjë prej vaksinave të prodhuara deri tani nuk garanton mbrojtje të plotë nga Covid-19. Mund ta kesh bërë vaksinën dhe sërish të infektohesh dhe kjo është provuar në disa raste deri tani.
Senatori republican Stephen Lych në SHBA u infektua pasi bëri dozën e dytë të vaksinës. Rick Pitino, basketbollist i njohur amerikan, doli pozitiv pas dozës së parë. E njëjta gjë i ndodhi edhe epidemiologut Pëllumb Pipero në Shqipëri.
Cilat janë arsyet që na bëjnë vulnerabël ndaj Covid-19 edhe pasi kemi marrë vaksinën?
Koha mes vaksinimit dhe mbrojtjes
Duhen disa ditë që vaksina të hyjë në veprim. Ekspertët shpjegojnë se ajo që njihet si përgjigje imunitare kërkon disa ditë kohë që të zhvillohet. Vaksina Pfizer ka treguar 52% mbrojtje 14 ditë pas dozës së parë.
Vaksina parandalon shumë, por jo plotësisht
Mund t’i kesh bërë të dyja dozat dhe sërish të infektohesh. Sigurisht, janë raste të rralla, por megjithatë hyjnë në atë 5% e vaksinës Pfizer apo 4% e Moderna-s.
Parandalohet sëmundja, por infeksioni mbetet i paqartë
Është ende e paqartë sa mund ta parandalojë vaksina infeksionin. Ekspertët thonë se ka gjasa që ne të infektohemi dhe të mos zhvillojmë simptoma, megjithëse kjo nuk dihet saktësisht në çfarë mase ndodh.
Vaksina nuk ka fuqi prapavepruese
Mund të ndodhë të kesh qenë pozitiv pa e ditur dhe të vaksinohesh. Në momentin që bën vaksinën, infeksioni është i pranishëm në trup dhe vaksina nuk e lufton dot.
Variantet e reja
Ka dyshime, pasi shkenca nuk ka ende një përgjigje përfundimtare, se vaksina nuk është njësoj efektive ndaj varianteve të reja të Covid-19. Këto të fundit janë shfaqur të gjitha pasi pjesa më e madhe e vaksinave ishin zhvilluar, prandaj imuniteti që ato gjenerojnë nuk dihet saktësisht nëse është i mjaftueshëm.
