Aksi rrugor Lezhë- Milot është bllokuar nga reshjet e dëborës. Lajmin e bëri me dije Policia Vendore e Lezhës, duke i bërë thirrje drejtuesve të automjeteve që të përdorin aksin e vjetër Lezhë- Milot. Përpos kësaj, policia bën thirrje që të shmangen daljet e panevojshme dhe të udhëtohet me kujdes.
“Territori i qarkut Lezhë është përfshirë nga reshje dëbore gjatë ditës së sotme duke sjell vështirësi në disa akse rrugore për drejtuesit e automjeteve.
Si pasojë e reshjeve të dëborës , prezencës së akullit në rrugë dhe erës së fortë, aksi rrugor Lezhë-Milot është i bllokuar. Këshillohet që drejtuesit e mjeteve të përdorin aksin e vjetër Lezhë-Milot.
Shërbimet e Policisë të DVP Lezhë, ndodhen në shërbim në të gjitha akset rrugore kryesore, për të drejtuar qarkullimin rrugor, me qëllim parandalimin e çdo aksidenti sado i vogël të jetë ai, si dhe për t’i ardhur në ndihmë çdo drejtuesi mjeti që mund të ketë probleme.
Policia e Lezhë u bën thirrje të gjithë përdoruesve të rrugës, të shmangin lëvizjet e panevojshme në rrugë, të tregojnë kujdes maksimal, të përdorin paisjet dimërore për automjetet,si dhe në raste emergjence të mos hezitojnë të kërkojnë ndihmën e policies”, shkruan policia.
