Udhëheqësit e 20 ekonomive më të mëdha të botës kanë miratuar një marrëveshje globale që do të të tatojë fitimet e bizneseve të mëdha me të paktën 15 për qind.
Kjo vjen pas shqetësimit se kompanitë shumëkombëshe po ridrejtojnë fitimet e tyre duke i deklaruar në vende me taksa më të ulëta.
Pakti mori dakordësin nga të gjithë liderët që merrnin pjesë në samitin e G20 në Romë.
Ndryshimet klimatike dhe Covid janë gjithashtu në axhendën e samitit, i cili po bashkon shumicën e liderëve ballë për ballë që nga fillimi i pandemisë.
Grupi G20, i përbërë nga 19 vende dhe Bashkimi Europian i mungon fizikisht presidenti kinez, Xi Jinping dhe ai rus, Vladimir Putin, që zgjodhën të shfaqen përmes lidhjes video.
Marrëveshja tatimore, e cila u propozua nga SHBA pritet të miratohet zyrtarisht të dielën, sipas agjencisë së lajmeve Reuters dhe do të fillojë të zbatohet brenda dy viteve.
Sekretarja e Thesarit e SHBA-së, Janet Yellen tha se marrëveshja historike ishte një “moment kritik” për ekonominë globale dhe “do t’i japë fund garës së dëmshme mes shteteve për të favorizuar korporatat”.
Ajo shkroi në Twitter se bizneset dhe punëtorët amerikanë do të përfitonin nga marrëveshja, edhe pse shumë kompani me bazë në SHBA do të duhet të paguajnë më shumë taksa.
Samiti i G20 vjen përpara samitit të shumëpritur COP26 për ndryshimet klimatike në Glasgow, i cili fillon të hënën. Ajo që ndodh në G20 mund të vendosë tonin për COP26, me ndarje të mprehta që mbeten midis vendeve në angazhimet e tyre për të trajtuar ndryshimet klimatike.
