Ministrja e Shëndetësisë Ogerta Manastirliu u bën thirrje qytetarëve të vaksinohen duke kontaktuar me mjekun e familjes. Ajo ka shpërndarë informacion në lidhje me vaksinimin e fëmijëve, kategoritë dhe vaksinat që duhet të marrin.
“Me këtë informacion të dobishëm për kategoritë e fëmijëve që duhet të vaksinohen ndaj Covid-19, ju ftoj të kontaktoni mjekun tuaj të familjes. Ekipet tona mjekësore janë në shërbim çdo ditë të javës në qendrat shëndetësore dhe pikat e vaksinimit të përqendruar”, shkruan ministrja.
Rekomandohet vaksinim i fëmijëve 12-15 vjeç me sëmundje kronike dhe të gjithë të grupmoshës 16-18-vjeç në çdo qendër shëndetësore apo pikë vaksinimi.
Vaksina merret përkundër një karte identiteti, ndërsa fëmijët duhet të jenë të shoqëruar me prindin apo kujdestarin e tyre. Për kategorinë deri në 18 vjeç aplikohet vaksina Pfizer.